Licha ya kushindwa kupata urais kwa mara ya tano Raila bado ana ushawishi

Baadhi ya wafuasi wa Raila Odinga walikuwa na mzaha wa muda mrefu kuhusu simu walizopiga kwa fundi cherehani wao kuhusu agizo-suti maalum ya vipande sita kuwa kamili, kwa ajili ya kuapishwa, wakitumai mwanasiasa huyo mkongwe angeshinda urais wakati huu.

Fundi cherehani alipewa vipimo vya suti kabla ya uchaguzi; ilighairiwa baada ya William Ruto kutangazwa mshindi; agizo hilo lilifufuliwa siku ambayo mawakili wa Bw Odinga walikuwa wakiwasilisha ushahidi wa kupinga ushindi wa Bw Ruto katika Mahakama ya Juu, lakini hatimaye likafutiliwa mbali wiki jana baada ya majaji kutupilia mbali maombi hayo na kuidhinisha matokeo ya uchaguzi wa urais wa Agosti 9.

Mioyo ilivunjika na wengi bado hawajafarijiwa ilipofahamika kwamba azma ya miongo mitatu ya kumwona Odinga akishinda urais ilikuwa imekamilika.

Uchunguzi wa kwa nini alishindwa kwa mara ya tano unaendelea, lakini baadhi ya wasaidizi wa karibu na washirika wamekuwa wakitoa sababu hizo kwenye mitandao ya kijamii.

Wengine wanasema kampeni hiyo iliathiriwa na uzembe, wengine wanahoji kuwa walimdharau Bw Ruto na kukosa kutoa ujumbe mwafaka wa kukabiliana ahadi yake ya kiuchumi ya ‘Bottom up’.

Lakini kilichofanya ushindi wa Ruto kuwa wa kustaajabisha sana ni jinsi yeye, ambaye bado anahudumu kama naibu wa rais, aliweza kugombea kama mtu wa nje na kumtaja Bw Odinga, gwiji wa siasa za upinzani na bingwa mkongwe wa demokrasia, kama “kibaraka” wa Rais Uhuru Kenyatta anayeondoka madarakani.

Katika barua yake ya kukataa mwaliko wa kuhudhuria hafla ya kuapishwa kwa Ruto Odinga, bila kufichua maelezo, aliahidi kutangaza “hatua zinazofuata tunapojaribu kuimarisha na demokrasia yetu”.

Licha ya utiifu wa wafuasi wake itakuwa vigumu kwake kuwakusanya kwa sababu nyingine ya kisiasa ambayo hailengi kutatua matatizo yao ya kiuchumi yanayowakabili mara moja.

Wengi, wanaoshukuru mchango wa Odinga katika kuimarisha demokrasia nchini, pia wanaonekana kusonga mbele na huenda wasiwe na nia ya kukataa matokeo ya uchaguzi wa mwezi uliopita, ambao bado anauona kuwa “usiojulikana”.

Iwapo kiongozi huyo mwenye umri wa miaka 77 atabaki katika siasa anabaki kuwa mtu mwenye uwezo zaidi – ikiwa sio mtu pekee – anayeweza kutoa msukumo kwa upinzani ambao unaonekana kuwa na mgawanyiko wakati nchi inahitaji kwa haraka upinzani wenye mpango na mzuriwenye uwezo wa kuiwajibisha serikali.