News/Habari

Saudia Arabia yaweka Masharti Makali kwa Wakenya wanaotafuta Ajira Nchini humo

kumechacha
Written by admin
  Saudia Arabia yaweka Masharti Makali kwa Wakenya wanaotafuta Ajira Nchini humo  
Serikali ya Saudi Arabia imeweka masharti makali kama hatua ya kuwahakikishia Wakenya usalama wao baada ya visa vya wafanyakazi kuteswa na hadi wengine kufariki nchini humo kuzua hasira.

Katika taarifa kwa vyombo vya habari kutoka kwa Wizara ya Leba, baadhi ya masharti hayo ni ikiwemo kuzinduliwa kwa mpango wa kulinda mishahara na nambari za simu za maafisa wa usalama.

Vile vile Saudia imebuni idara ya ulinzi na usaidizi chini ya Wizara ya Rasilimali Watu na maendeleo ya jamii ambayo itashughulikia malalamishi kutoka kwa wafanyikazi wahamiaji, mashirika ya kuajiri na balozi.

Katika kupiga jeki mpango huo, serikali ya Saudi Arabia ilichukuwa hatua zaidi ya kuanzisha mpango wa wafanyakazi kuwa huru kubadilisha waajiri iwapo watakabiliwa na aina yoyote ya unyanyasaji.

Mabadiliko hayo mapya pia yamefafanua taratibu hizo kwa kina kuhusu jinsi wafanyikazi wanaweza kutoka au kurefusha mkataba wao.

Hatua nyingine ni kutumia utaratibu mbadala wa kutatua migogoro unaoruhusu kesi kuwasilishwa mahakamani na kutatuliwa ndani ya wiki tatu.

Wakati uo huo humu nchini, serikali ya Kenya ilianzisha utaratibu wa kukagua na kutafuta maoni ya jamii ili kufuatilia mashirika ya kibinafsi ya ajira.

Hii itasaidia katika kuhakikisha kuwa kuna maadili katika zoezi la kuajiri na kuondoa mashirika yasiyo na uadilifu na kuwataka Wakenya kutumia mashirika yaliyoidhinishwa pekee.

Aidha, mashirika ya uajiri pia yatalazimika kuwafafanulia Wakenya wanaotafuta kazi katika nchi za Uarabuni sheria mpya kabla ya kutia saini kandarasi.

Sheria hizo mpya zinajiri baada ya masaibu ya Wakenya kadhaa wanaokabiliwa na dhuluma katika nchi za Uarabuni kuibuka.

Kisa kilichogusa nyoyo za wengi kilikuwa cha Mkenya, Diana Chepkemoi, mwenye umri wa miaka 24, aliyegonga vichwa vya habari baada ya picha zake kusambaa mitandaoni na kuzua hasira.

Hasira za Wakenya zilichochea serikali kuingilia kati na kumrudisha Diana nchini siku chache baada ya masaibu yake kuangaziwa.

Chepkemoi baadaye alipata kazi na ufadhili wa masomo kutoka Chuo Kikuu cha Meru ili kuendelea na masomo yake.

About the author

admin

Leave a Comment